மிஸ்டுகால் மூலம் வந்த விபரீதம் சிறை சென்ற வாலிபர்…

திருநெல்வேலி – டிச – 17,2023

Newz – webteam

நெல்லை அருகே மிஸ்டுகால் மூலம் அறிமுகமாகி இளம்பெண்ணிடம் செல்போனில் ஆபாசமாக பேசியவர் கைது

நெல்லை, டிச.17: நெல்லை அருகே மிஸ்டு கால் மூலம் பழக்கமான இளம்பெண்ணிடம் ஆபாசமாக பேசிய ராஜபாளையம் வாலிபரை போலீசார் கைது செய்து சிறையில் அடைத்தனர்.

நெல்லை அருகே திருமணமான 28 வயது இளம்பெண்ணின் செல்போனுக்கு அறிமுகம் இல்லாத வாலிபரிடம் இருந்து போன் வந்தது. அப்பெண் போனை எடுத்து ராங்கால் என கூறியுள்ளார். ஆனால் பெண்ணின் குரலுக்கு மயங்கிய மறுமுனையில் பேசிய வாலிபர் தனக்கு ராஜபாளையம் எனவும், தனது பெயர் அருண்குமார் (25) எனவும் கூறி அப்பெண்ணிடம் பேசியுள்ளார். இதனை அப்பெண் தவிர்த்துள்ளார். மேலும் அந்த பெண் தனக்கு திருமணமாகி கணவன், மகன் உள்ளனர் என தெரிவித்துள்ளார்.

ஆனாலும் அருண்குமார் விடாமல் அப்பெண்ணிடம் அடிக்கடி செல்போனில் தொடர்பு கொண்டு ஆபாசமாக பேசியுள்ளார். இதனை இளம்பெண் கண்டித்துள்ளார். இந்நிலையில் உங்களை பார்க்க நெல்லைக்கு வந்துள்ளதாக அவர் கூறியுள்ளார். இதுகுறித்து இளம்பெண் பாளை தாலுகா போலீசில் புகார் அளித்தார். புகாரின் பேரில் போலீசார் பாளை அருகே சீவலப்பேரி மெயின் ரோட்டில் உள்ள பாத்திமா கோயில் அருகே நின்ற அருண்குமாரை சுற்றிவளைத்தனர். தொடர்ந்து அவர் மீது போலீசார் வழக்கு பதிந்து விசாரணை நடத்தி, அவரை கைது செய்து சிறையில் அடைத்தனர்.