தூத்துக்குடி – நவ -23,2025
Newz – Webteam
இலங்கைக்கு கடத்த முயன்ற ₹1.25 கோடி மதிப்பிலான மருந்துப் பொருட்கள் பறிமுதல் – கடத்தல்காரர்கள் தப்பியோட்டம்
தூத்துக்குடி மாவட்டம், திருச்செந்தூர் அருகே வீரபாண்டியன்பட்டினம் கடற்கரையில் இருந்து இலங்கைக்கு படகு மூலம் கடத்த முயன்ற சுமார் ஒரு கோடியே இருபத்தைந்து லட்சம் ரூபாய் மதிப்பிலான மருந்துப் பொருட்களை ‘கியூ’ பிரிவு போலீசார் பறிமுதல் செய்தனர். போலீசாரைக் கண்டதும் கடத்தல்காரர்கள் படகுடன் தப்பிச் சென்றனர்.
திருச்செந்தூர் அருகே உள்ள வீரபாண்டியன்பட்டினம் கடற்கரை வழியாக இலங்கைக்கு பெருமளவில் மருந்துப் பொருட்கள் கடத்தப்பட இருப்பதாக தூத்துக்குடி ‘கியூ’ பிரிவு (தகவல் சேகரிப்புப் பிரிவு) ஆய்வாளர் விஜய அனிதாவுக்கு ரகசியத் தகவல் கிடைத்தது.
அவரது உத்தரவின் பேரில், உதவி ஆய்வாளர் ராமசந்திரன், சிறப்பு உதவி ஆய்வாளர் ராமர் ஆகியோர் தலைமையிலான போலீசார் இன்று (நவ. 22) அதிகாலை 2 மணியளவில் அப்பகுதியில் தீவிர ரோந்துப் பணியில் ஈடுபட்டனர்.
அப்போது, சூர்யா மரக்கிடங்கு பின்புறம் உள்ள கடற்கரையில் சந்தேகத்திற்கிடமான வகையில் 15 மூட்டைகள் வைக்கப்பட்டிருந்தன. போலீசார் அங்கு விரைந்து சென்றபோது, சில நபர்கள் அங்கிருந்த படகில் ஏறி கடலுக்குள் தப்பிச் சென்றனர்.
இதனையடுத்து, போலீசார் அந்த மூட்டைகளைச் சோதனையிட்டபோது, அதில் இலங்கைக்கு கடத்துவதற்காக வைக்கப்பட்டிருந்த பல்வேறு வகையான மாத்திரைகள், ஊசிகள் மற்றும் மருந்துத் திரவங்கள் இருந்தது தெரியவந்தது.
பறிமுதல் செய்யப்பட்ட பொருட்களில், பிரெகாப், டைசல்ஃபிராம், காடிலா, அமன்ட்ரெல் வகை மாத்திரைகள், ஹைட்ராக்ஸிப்ரோஜெஸ்டிரோன் ஊசிகள், மற்றும் நரம்பு வழி செலுத்தப்படும் கொழுப்புப் பால்மத் திரவங்கள் உள்ளிட்டவை அடங்கும். இதன் மொத்த மதிப்பு சுமார் ₹1.25 கோடி என மதிப்பிடப்பட்டுள்ளது.
பறிமுதல் செய்யப்பட்ட 15 மூட்டை மருந்துப் பொருட்களையும் ‘கியூ’ பிரிவு போலீசார் கைப்பற்றினர். இவை மேலதிக விசாரணைக்காக சுங்கத்துறையிடம் ஒப்படைக்கப்பட உள்ளன.
மேலும், படகுடன் தப்பி ஓடிய கடத்தல்காரர்களைப் பிடிப்பதற்காக தனிப்படை அமைக்கப்பட்டு தீவிர தேடுதல் வேட்டை நடைபெற்று வருகிறது.
0 Comments